ភ្នំពេញ៖ ផ្ទុះការរិះគន់យ៉ាងខ្លាំង ទៅលើអ្នកសារព័ត៌មានអនឡាញមួយរូប ក្រោយបញ្ចេញកាយវិការ និងពាក្យសម្ដីយ៉ាងគំហុក ទៅលើបុរសម្នាក់ដែលព្យាយាមជួយលើកម៉ូតូអ្នកជួបគ្រោះថ្នាក់ចរាចរណ៍កាលពីថ្មីៗនេះ។

មហាជនមានមតិរិះគន់យ៉ាងច្រើន ចំពោះទង្វើរបស់អ្នកសារព័ត៌មានអនឡាញរូបនេះ ក្នុងនោះដែរទីប្រឹក្សាសម្តេចតេជោ ហ៊ុន សែន និងជារដ្ឋលេខាធិការក្រសួងព័ត៌មាន លោក ជុំ កុសល បានបញ្ចេញមតិប្រតិកម្មលើអ្នកសារព័ត៌មានរូបនេះផងដែរ ដោយថា មនុស្សមានចិត្តសង្រ្គោះ ឃើញគ្រោះថ្នាក់នៅចំពោះមុខ ចុះជួយ ដែលនេះជាកាយវិការគួរឲ្យកោតសរសើរ តែបែរជាទទួលរងនូវការស្តីបន្ទោសពីអ្នកសារព័ត៌មាន និងសមត្ថកិច្ចនគរបាលទៅវិញ។

លោកក៏បានឱ្យដឹងទៀតថា ករណីលើកម៉ូតូចេញ មិនមែនជារឿងខុសច្បាប់នោះទេ គ្រាន់តែបាត់ដានដែលជាហេតុនាំឲ្យសមត្ថកិច្ចនគរបាលចរាចរណ៍ពិបាកក្នុងការវាស់វែងតែប៉ុណ្ណោះ ហើយបុរសនោះក៏បានលើកដៃសុំទោសហើយ ដោយសារតែមិនដឹង។ លោក ជុំ កុសល បានផ្តល់យោបល់ថា អ្នកសារព័ត៌មានគួរតែនិយាយពន្យល់ប្រាប់ ដោយសំដីទន់ភ្លន់ ពោលមិនគួរស្រែកគំហកឡើយ។

លោកថា៖ «កាយវិការ និងពាក្យសំដីរបស់អ្នកសារព័ត៌មានបែបនេះគឺជាការបំបាក់ទឹកចិត្តដល់អ្នកក្រោយៗទៀត ដែលជួបរឿងបែបនេះខ្លាច មិនហ៊ានជួយទេ។ សូមគិតឡើងវិញ កុំប្រើតួនាទីជ្រុលចេញឆ្ងាយពីតួនាទីស្នូលរបស់ខ្លួនពេក វានាំឲ្យបាត់តម្លៃ»។

យ៉ាងណាមិញ អ្នកសារព័ត៌មានអនឡាញរូបនោះបានសូមទោសចំពោះទង្វើដែលខ្លួនបានប្រព្រឹត្តខណៈមហាជននៅតែប្រតិកម្ម និងមិនពេញចិត្តចំពោះអ្នកសារព័ត៌មានប្រព្រឹត្តលើសពីវិជ្ជាជីវៈអ្នកសារព័ត៌មាន៕